S’estree ‘La bola negra’, era pellicula des Javis que representarà Espanha enes Òscar

La bola negra ei era naua pellicula des Javis, eth duo format pes directors Javier Calvo e Javier Ambrossi, coneishudi prèviaments per sèries coma La Mesías o Paquita Salas. Eth longmetratge s’estree aguest diuendres 25 de seteme enes cinèmes espanhòls, dempús de recórrer quauqu’uns des hestivaus mès importanti deth mon.

Era cinta partís d’ua òbra qu’eth poèta e dramaturg Federico García Lorca deishèc inacabada abans de morir e que pòrte eth madeish títol.

Era istòria connècte es vides de tres òmes omosexuaus en tres epòques desparières: 1932, 1937 e 2017. Es personatges principaus les interpreten Milo Quifes, Guitarricadelafuente (que debute coma actor) e Carlos González. Ath delà, compde damb era participacion de Penélope Cruz, que balhe vida a ua cupletista pendent era Guèrra Civila, e dera actritz nòrd-americana Glenn Close.

Eth projècte a generat ua expectacion fòrça grana. Dimenge se projectèc en Hestivau de Sant Sebastian, a on era equipa dera pellicula arrecebec ua longa ovacion deth public. Uns dies abans, era pellicula s’auie emportat eth Prèmi deth Public en Hestivau de Torònto (TIFF), un des guerdons mès prestigiosi deth concors canadian.

Ath delà, era Acadèmia de Cinèma espanhòla a escuelhut La Bola Negra entà representar Espanha ena categoria de milhora pellicula internacionau enes pròplèu Prèmis Òscar, que se celebraràn eth 14 de març de 2027. Abans, era pellicula auie ja arrecebut lèu 20 menutes d’aplaudiments en Hestivau de Canes, a on Calvo e Ambrossi guanhèren eth prèmi ara milhora direccion.

Era grana aposta deth cinèma espanhòl

Era candidatura de La bola negra arribe entornejada d’arguments a favor. Eth prumèr ei eth supòrt de Netflix, que distribuirà era pellicula enes Estats Units e que, segons mejans especializadi, poderie invertir ath torn de 20 milions d’èuros ena sua campanha de promocion pendent era sason de prèmis. Ath delà, quauqu’uns pronostiquen entre sèt e catorze possibles nominacions enes Òscar.

Tanben i jògue a favor er istoriau deth prèmi de Torònto. Des catorze darrèri guanhadors deth Prèmi deth Public deth TIFF, tretze an acabat en tot èster nominadi ar Òscar ara milhora pellicula. Títols emblematics coma 12 ans d’esclavitut o Green Book quitament s’emportèren era estatueta.

Entre es risqui, era critica internacionau a soslinhat qu’era durada dera pellicula ei un shinhau excessiva: mès de dues ores e mieja. Quauqu’uns tanben critiquen un estil grandiloqüent, ei a díder, fòrça espectacular e exagerat, que se bastís sus un teishum narrativament simple. Tanben i a eth risc des expectatives desmesurades: es madeishi directors an admetut qu’an pòur de decéber eth public espanhòl dempús de tant detapatge mediatic.

Fin finau, era competéncia enes Òscar serà fòrça exigenta. Encara manquen entà veder-se títols damb pro fòrça, coma era naua pellicula d’Alejandro González Iñárritu damb Tom Cruise o Dune: part tres, de Denis Villeneuve. Eth pròpri productor dera cinta, Jorge Pezzi, arrebrembe que damb Sirât, era anteriora candidata espanhòla, s’arribèren a anonciar ueit nominacions possibles e, fin finau, sonque ne sigueren dues.

Com t’afècte aguesta notícia?

La bola negra explique ua part importanta dera istòria recenta d’Espanha. Federico García Lorca siguec assassinat en 1936, ar inici dera Guèrra Civila espanhòla, pera sua ideologia progressista e pera sua condicion d’òme omosexuau en ua epòca en qué açò ère perseguit e punit.

Era pellicula met sus era taula com an cambiat es drets des persones LGTBIQ+ des d’alavetz, e com cau, encara, evolucionar. En Espanha, eth matrimòni entre persones deth madeish sèxe non se legalizèc enquia 2005, lèu setanta ans dempús dera mòrt de Lorca. Conéisher aguesta evolucion ajude a compréner per qué encara aué i a debats sociaus sus igualtat e drets civius.

Aguest fenòmen audiovisuau tanben ei ua bona oportunitat entà compréner coma foncione eth cinèma peth darrèr dera pantalha. Qué ei un hestivau de cinèma, per qué i a prèmis abans qu’ua pellicula arribe enes sales, o qué signifique qu’un país “represente” ua pellicula enes Òscar.

Fin finau, eth succès internacionau de La bola negrademòstre qu’eth cinèma hèt en Espanha pòt competit de parièr a parièr damb es granes produccions de Hollywood. Ei un exemple qu’era cultura e era creativitat non comprenen de termières e que, soent, es istòries mès pròplèus son es que mès retronissen per tot eth mon.

Er ABC dera notícia

– Òscar a milhora pellicula internacionau: categoria des prèmis Òscar qu’arreconeish era milhora pellicula non rodada originaument en anglés. Cada país sonque pòt presentar-i un títol, escuelhut pera sua pròpria Acadèmia de Cinèma.

– Hestivau de Canes: un des hestivaus de cinèma mès prestigiós deth mon, celebrat cada an en França. I assistissen es directors e actors mès importanti deth cinèma internacionau e s’i autregen prèmis coma era Palma d’Aur.

– TIFF (Hestivau Internacionau de Cinèma de Torònto): concors de cinèma que se celèbre en Canadà. Eth sòn Prèmi deth Public lo vòten es madeishi espectadors e, istoricament, acostume a anticipar quines pellicules acabaràn nominades enes Òscar.

– Guèrra Civila espanhòla: conflicte armat qu’afrontèc Espanha entre 1936 e 1939, entre eth bando republican e eth bando liderat peth generau Francisco Franco. Acabèc damb era instauracion d’ua dictadura que durèc enquia 1975.

– Federico García Lorca: poèta e dramaturg espanhòl, un des escrivans mès importanti deth sègle XX ena lengua castelhana. Siguec assassinat en 1936, ar inici dera Guèrra Civila, damb sonque 38 ans.

– Dramaturg: escrivan d’obres literàries concebudes entà èster representades en un espaci scenic.

– Teishum: hilat de relacions, un tramat sociau o er agument complèxe d’ua istòria. Orde e succession des eveniments que hèn era istòria d’ua novèla, òbra de teatre o pellicula.

– Tapatge mediatic: excès d’informacion, opinions e polemiques enes mejans de comunicacion, que dificulte compréner es hèts reaus.

– Debat sociau: escambi public d’opinions e idèes sus ahèrs de relevància collectiva que preocupen ara ciutadania.

Activitat