Donald Trump proïbís er accès de tres mejans de comunicacion ara Casa Blanca

Eth president d’Estats Units, Donald Trump, anoncièc eth 18 de seteme que proïbie as jornalistes de CNN, MS NOW e Politico accedir ara Casa Blanca. A trauès deth sòn hilat sociau, Truth Social, anoncièc era mesura damb un burlesco vidèo a on se vedien volar bosses de lordèra dera Casa Blanca damb eth nòm des tres mejans expulsadi.

Trump justifiquèc era mesura en tot acusar ad aguesti mejans de difóner “notícies fausses” sus eth e era sua Administracion, e menacèc damb préner mesures similares contra d’auti mejans. Era decision se hec efectiva londeman, quan jornalistes des tres enterpreses non poderen entrar ath recinte a on trabalhe eth president.

Non ei eth prumèr còp que Trump sage de limitar eth trabalh jornalistic. Pendent eth sòn actuau mandat, a demandat a diaris coma The Wall Street Journal e vetat er accès a reportèrs e fotografs dera agéncia Associated Press a espacis coma eth Burèu Oval (eth sòn burèu ena Casa Blanca).

En aguest cas, eth veto deth president a provocat ua responsa immediata per part d’ABC, CBS, NBC e Fox News, es principaus canaus de television d’Estats Units. Aguestes an anonciat que non realizaràn era cobertura audiovisuau des actes presidenciaus, coma ua senhau de protèsta per çò que les a succedit as sòns companhs de profession.

Era causa non a demorat atau sonque. Dempús de çò succedit CNN, MS NOW e Politico an presentat ua demanda contra Trump e membres dera sua Administracion. Es tres mejans demanen que se les retorne er accès ara Casa Blanca e sostien qu’eth veto menace era libertat de premsa e eth dret des ciutadans a accedir a un jornalisme independent.

Qué ei eth “pool” televisiu?

Entà compréner era polemica cau conéisher coma trabalhen es jornalistes qu’informen sus eth president des Estats Units. Era Casa Blanca ei eth lòc a on trabalhe Trump e era sua equipa, e aquiu se celèbren amassades, ròdes de premsa e d’auti actes. Es mejans an de besonh accès ad aguesti espacis entà poder informar dirèctament as ciutadans sus es decisions que pren eth govèrn e es activitats que hè.

Coma non toti es jornalistes pòden èster presents en cada acte, existís un sistèma cridat “pool” de premsa. Se tracte d’un grop redusit de jornalistes qu’entre laguens d’aguesti eveniments e s’encargue d’arremassar informacion e imatges que dempús compartís damb d’auti mejans. Atau, toti pòden aufrir era informacion sense auer d’enviar as sues equipes.

En cas des televisions, aguest “pool” ei compausat pes cinc principaus canaus des Estats Units: ABC, CBS, CNN, NBC e Fox News. Sonque eres pòden hèr torns entà entrar damb es sòns jornalistes ad aguesti actes presidenciaus e hèr ua cobertura audiovisuau.

Çò que passe ara ei qu’era CNN a estat vetada e es autes quate, entà balhar supòrt ara sua companha, s’an negat a corbir es actes de Trump. Quina ei era conseqüéncia? Que non i aurà imatges prenudes per mejans independenti sus es activitats deth president.

Era Casa Blanca pòt aufrir es sues pròpries gravacions, mès açò a un risc. Sense jornalistes presents, eth govèrn aurà un major contraròtle sus com se presente era informacion as ciutadans.

Per qué ei important respectar e garantir era libertat de premsa?

Anàlisi Sofia Cabanes

Jornalista de Catalonha Informacion

Per qué ei important respectar e garantir era libertat de premsa?

Anàlisi Sofia Cabanes

De quina manèra t’afècte aguesta notícia?

T’as preguntat quauque còp qui decidís çò que ves en ua notícia? Quan guardes un vidèo en hilats sociaus o television, non pòs veir tot çò qu’a arribat, senon ua seleccion d’imatges e informacion. Imagina qu’aguesta seleccion la hesse dirèctaments un govèrn en lòc de mejans de comunicacion independenti.

Es jornalistes pòden investigar, hèr qüestions e decidir quina informacion e quines imatges an de besonh entà explicar çò qu’arribe. S’eth govèrn contròtle grana part d’aguestes donades qu’arriben ath public, es ciutadans an mens possibilitats de conéisher çò que passe des de desparièrs punts d’enguarda.

Per açò, era libertat de premsa permet qu’es mejans poguen informar sus çò que hèn es govèrns sense depéner unicaments dera informacion qu’aguesti les proporcionen.

Er ABC dera notícia

Casa Blanca: residéncia oficiau e eth lòc de trabalh deth president des Estats Units e era sua equipa. Aquiu se celèbren reünions, ròdes de premsa e auti actes restacadi damb eth govèrn.

Veto: decision qu’empedís qu’ua persona, grop o entitat pogue accedir a un lòc, participar en ua activitat o hèr quauquarren qu’abans podie hèr.

Cobertura audiovisuau: gravar imatges e àudio d’un eveniment entà que dempús poguen emplegar-se en television e d’auti mejans. “Hèr ua cobertura” O “Corbir un acte” son formes de díder qu’es jornalistes son presents entà informar sus çò qu’arribe.

Libertat de premsa: dret des jornalistes e mejans a investigar, informar e publicar informacion sense qu’eth govèrn pogue decidir qué an de condar.

Hilat sociau: plataformes digitaus que permeten as persones e enterpreses connectar-se, comunicar-se e compartir contengut en temps reau en quinsevolh part deth mon.

Mejan de comunicacion: airines o canaus que s’empleguen entà transméter informacion, idèes e entreteniment a ua o a fòrça persones.

“Pool” televisiu: grop redusit de jornalistes qu’entre laguens des eveniments e s’encargue d’arremassar informacion e imatges que dempús compartís damb d’auti mejans.

Corbir (un acte/eveniment): registrar damb vidèos o fotografies un eveniment entath que quauquarrés a estat contractat o assignat.

Contraròtle: direccion o domeni qu’a ua persona sus ua organización, un sistèma, ua maquina, eca.

Activitat