Casc obligatòri entàs patinets electrics: qué diden es naues nòrmes de circulacion?

Er 1 d’octobre entrèc en vigor era reforma deth Reglament Generau de Circulacion, era nòrma que regule eth conjunt de nòrmes oficiaus que determinen com mos cau circular toti pes vies publiques, des des coches enquias pedons. Era naua actualizacion dèishe darrèr un modèl ancian pensat lèu exclusivament entàs coches e met en centre es persones e es naues formes de botjar-se pera ciutat.

Per prumèr viatge, era lei arreconeish oficiaument era figura der usatgèr vulnerable dera via. Laguens d’aguesta categoria s’i includissen es pedons, es ciclistes, es usatgèrs de veïculs de mobilitat personau (VMP) e es motociclistes. Er objectiu ei protegir a qui non pòrte eth chassís d’un coche dessús e arténher que toti poguen compartir eth carrèr sense perilh.

Entre es cambiaments que s’an aplicat, destaquen eth que afècten ara circulacion damb patinet electric. A compdar d’ara s’establís ua edat minima de 15 ans entà poder-les condusir e eth casc passe a èster 100% obligatòri. Tanpòc non poderàs gésser de net sense justet reflectant. Ath delà, tanben passe a èster obligatòri portar era lum alugada permanentament, tanben de dia.

Es naues nòrmes tanben afècten ara bicicleta. Ena ciutat, a compdar d’ara calerà circular preferentament peth centre deth tòn carril e es coches auràn de mantier ua distància de seguretat minima de 5 mètres se van darrèr tòn. Se te mòs en mòto o ciclomotor, er usatge de caucèr barrat passe a èster obligatòri en quinsevolha via, çò que vò díder que non poderàs anar damb sandàlies. Per carretèra, es guants tanben seràn obligatòris.

Ath delà, era lei tanben incorpòre nòrmes entàs persones que trabalhen damb veïculs de dues arròdes, com per exemple es riders. Entà da eri serà totaument obligatòri portar casc e justet reflectant autant se van en bicicleta com damb patinet o mòto.

Qué ei era educacion viària e per qué ei importanta?

Es nòrmes qu’arrecuelh eth Reglament Generau de Circulacion non s’apliquen de manèra isolada, senon qu’an de besonh çò que coneishem coma educacion viària. Ei eth conjunt de coneishences, valors e abituds que mos permeten compartir er espaci public de manèra segura, respectuosa e sostenibla. En definitiua, era nòrma non existís entà retalhar era nòsta libertat, senon entà garantir que toti poguen tornar tà casa en bon estat ara fin deth dia.

Sautar-se es nòrmes o pensar que non passe arren entà per hèr cas un dia ei un error que pòt auer conseqüéncies reaus e, en bèri casi, fòrça grèus. Segontes donades dera Dirección General de Tráfico (DGT), mès deth 50% des mòrts en accidents de transit en Espanha dejà corresponen a pedons, ciclistes e motociclistes. Era manca de proteccion fisica hè que quinsevolh impacte que sigue mès enlà de 30 km/o contra un patinet o un pedon age un naut risc de provocar lesions grèus o mortaus.

Se circules peth trepadèr damb patinet, non emplegues eth casc o camines distrèt en tot guardar eth telefonet son infraccions que te pòden comportar ua multa economica, mès eth mès grèu ei que pòden provocar envestiments o accidents que mos hèsquen mau a nosati o as auti. Per açò cau èster respectuosi damb es nòrmes e velhar entà que toti les complisquen e atau pogam circular de forma segura, en especiau era mainadèra e es persones granes.

Com t’afècte aguesta notícia? 

Era reforma deth Reglament Generau de Circulacion impacte dirèctament ena tua rotina jornalièra e ena manèra com te relaciones damb era tua ciutat. Veïculs coma es patinets electrics o es bicicletes s’an convertit en mejan de transpòrt preferit des joeni pera sua rapiditat e prètz, mès era manca d’ua regulacion clara generaue situacions de perilh constant.

Ara, en tot fixar era naua edat minima de 15 ans e eth caractèr obligatòri deth casc, s’acabe eth uet legau. S’emplegues eth patinet, aurà d’integrar era equipa de proteccion coma un element.

Entàs qui se desplacen en mòto o ciclomotor, un des transpòrts mès populars entà fòrça joeni a compdar des 16 o 18 ans, era nòrma t’obligue a cambiar cèrtes abituds. Anar damb sandàlies o sabates dubèrtes pendent es mesi de calor dejà non ei ua opcion, e es guants seràn un requisit obligat ena carretèra. Son detalhs que pòden semblar incomòdes ath principi, mès que pòden evitar herides e cremades d’extrèma gravetat en cas d’ua queiguda.

D’aute biais, se trabalhes en tot hèr de rider entà plataformes de despartiment, aguesta lei te protegís milhor mès tanben t’exigís mès. Eth caractèr obligatòri permanent deth casc e eth justet reflectant milhore era tua visibilitat deuant dera rèsta de conductors, especiaument pendent es torns de net o en condicions de ploja e pòga lum.

Adaptar-se as cambiaments des deth prumèr dia te sauvarà de multes, mès, sustot, te protegirà ena carretèra.

Er ABC dera notícia

Pedons: Persona que va a pè per ua via.

Justet reflectant: Pèça essenciau de ròba de seguretat viària e laborau dessenhada entà garantir era maxima visibilitat en condicions de risc o pòga lum.

Trepader: Lòc deth carrèr o de ua auta via publica, damb tèrra, avient entath transit des persones.

Envestiment: Ei er acte en qu’un veïcul en moviment tope o passe peth dessús d’ua persona, un animau o un objècte.

Usatgèr vulnerable dera via: Persona que circule pera via publica sense era proteccion d’un chassís metallic (coma eth d’un coche) e que, donques, a un risc fòrça mès naut de patir lesions grèus en cas d’accident. Includís pedons, ciclistes, usatgèrs de patinets electrics e motociclistes.

Veïcul de Mobilitat Personau (VMP): Veïcul d’ua o mès arròdes dotades d’ua soleta plaça e propulsat exclusivament per motors electrics (coma es patinets electrics). Pòden arténher ua velocitat maximau per dessenh d’entre 6 e 25 km/o.

Educacion viària: Conjunt de coneishences, valors, actituds e abituds de convivéncia que permeten a totes es persones utilizar es vies publiques de manèra segura, respectuosa e sostenibla, damb er objectiu de previer accidents de transit.

Rider: Repartidor que hè liuraments en abitança (normaument de minjar o petiti paquets) entà plataformes digitaus en tot utilizar veïculs de dues arròdes, coma ara biciclètes, patinets electrics o motocicletes.

Activitat