Espanha obtien es pejors resultats dera sua istòria en informe PISA

Er informe PISA ei un estudi internacionau que realize era Organizacion entara Cooperacion e eth Desvolopament Economic (OCDE) entà conéisher com trabalhen es estudiants e quines competéncies an aquerit. Er estudi se dividís en pròves de matematiques, lectura e sciéncies, a on er alumnat a de demostrar s’ei capaç d’aplicar çò d’aprenut en classa ara ora de resòlver problèmes e ahèrs reaus.

Es resultats s’exprimissen mejançant ua puntuacion que permet comparar eth rendiment d’alumnes de desparièrs païsi e sistèmes educatius. Per exemple, en Espanha, es estudiants an obtengut 477 punts en sciéncies, 469 en matematiques e 496 en lectura. Enes tres matèries, aguestes puntuacions se tròben per dejós dera mejana dera OCDE.

Ua des donades que mès a cridat era atencion ei restacada damb era comprenença lectora, ei a díder, era capacitat entà compréner çò que se lieg. En Espanha, sonque eth 2% des joeni a abiletat entà liéger tèxtes longui e complèxes (mès de 400 mots) e entà distinguir entre hèts e opinions encara qu’aguesta distincion non apareishe de forma explicita en tèxte.

Es estudiants qu’an obtengut es milhores puntuacions en informe de 2025 vien d’Àsia, especiuaments Singapor, China, Japon, Corèa deth Sud e Taiwan. En Euròpa, destaquen Estònia, Irlanda e Reiaume Unit, que tanben se placen entre es païsi damb milhors resultats.

Es causes

Era OCDE pòrte temps en tot analisar es competéncies des estudiants e, enes darrèri dètz ans, a vist com es resultats en lectura, matematiques e sciéncies an empejorat en fòrça païsi. Per açò, ena edicion de 2025 an decidit ahíger un apartat sus es causes que poderien explicar aguest empejorament.

Ua d’eres ei restacada damb era atencion e er esfòrç. PISA apunte qu’es estudiants an de mès en mès dificultats entà concentrar-se quan un prètzhèt ei long o complicat. En Espanha, ath delà, i a mens alumnes que diden auer curiositat per apréner causes naues e que son disposadi a esforçar-se quan un prètzhèt se complique.

Un aute factor ei restacat damb es abitudes de lectura. De cada viatge i a mens joeni que liegen libres, revistes o periodics en papèr, e era majoritat emplegue dispositius digitaus entà cercar informacion o comunicar-se. Segontes era organizacion, es qué liegen libres de ficcion e tèxtes longui obtien milhors resultats en comprenença lectora pr’amor que son mès acostumadi a mantier era atencion pendent mès temps.

Es telefonets, es pantalhes e era intelligéncia artificiau tanben an cambiat era forma d’estudiar. Aguesti estruments pòden èster utils entà apréner, mès eth sòn emplec tanben pòt dificultar era concentracion o hèr que quauqui alumnes depenen d’eres entà realizar determinadi prètzhèts.

Per exemple, es estudiants qu’abituaument empleguen era IA entà prètzhèts escolars especifics, coma resumir tèxtes, redigir o investigar, artenheren puntuacions mès baishes ena pròva de sciéncies qu’es que non l’empleguen pas.

De quina manèra t’afècte aguesta notícia?

Es resultats der informe PISA balhen ua imatge generau de coma aprenen es estudiants e quines dificultats an. Aguesta informacion ei utila especiaument entàs govèrns e es institucions educatives, que pòden préner decisions enes collègis e instituts entà milhorar es sues competéncies. Mès, e a tu? De quina manèra t’afècte?

Principaument, era notícia d’aué pòt servir-te tà hèr-te qüestions. Lieges abituauments o sonque quan te manen un prètzhèt de classa? Pòdes concentrar-te pendent ua estona longa sense distrèir-te en tot guardar eth telefonet? Qué hès quan quauquarren non te ges ath prumèr intent? Sages de comprené’c o li preguntes dirèctament ara IA? 

Non i a ua unica responsa corrècta ad aguestes qüestions, mès soscar sus eres pòt ajudar-te a conéisher era tua forma d’apréner e a descorbir quini aspèctes pòdes milhorar.

Er ABC dera notícia

Competéncies: Emplegar çò que sabem (coneishements), çò que podem hèr (abilitats) e coma actuam (actitudes) deuant d’un prètzhèt.

Prètzhèts escolars: activitats assignades pes mèstres entà realizar dehòra der orari des classes damb era finalitat de refortir çò d’aprenut.

PISA: sigles de Programa entara Avaloracion Internacionau des Estudiants. Ei un estudi internacionau dera OCDE qu’avalore cada cèrt temps es abiletats qu’an es estudiants de 15 ans en airaus coma lectura, matematiques e sciéncies.

OCDE: Sigles d’Organizacion entara Cooperacion e eth Desvolopament Economics. Ei un organisme compausat per 38 païsi que s’encargue de coordinar politiques economiques e sociaus.

Abitud de lectura: rotina de liéger damb frequéncia, ja siguen libres, revistes, periodics o d’auti tèxtes, ja sigue per entreteniment, entà informar-se o apréner.

Capacitat de concentracion: capacitat de mantier era atencion en un prètzhèt pendent un temps, sense distrèir-se facilament, entà poder comprener-la e acabar-la.

Soscar: meditar, reflexionar.

Activitat