Pedro Sánchez convòque eleccions generaus entath 29 de noveme

Eth president deth govèrn espanhòl, Pedro Sánchez, a anonciat era convocatòria d’eleccions generaus. Es ciutadans anaràn tàs urnes eth pròplèu 29 de noveme entà escuélher es deputats e senadors que formaràn es naues Corts Generaus e que representaràn ara ciutadania pendent era següenta legislatura.

Era decision arribe dempús que PP, Vox e Junts refusèssen en Congrès dus decrèts restacadi damb er abitatge aprovadi peth govèrn espanhòl. Un reiau decrèt lei ei ua norma qu’eth govèrn espanhòl pòt aprovar en situacions de besonh urgent, mès que dempús a d’èster convalidada peth Congrès entà seguir vigenta.

Laguens des mesures qu’includien es decrèts, se prepausaue frenar es desnonaments de persones vulnerables, regular es loguèrs temporaus, aufrir ajudes entà crompar un prumèr abitatge e facilitar eth renauïment automatic des contractes de loguèr.

Eth refús d’aguesti decrèts manifestèren ua des principaus dificultats deth Govèrn pendent aguesta legislatura: eth PSOE e es sòns sòcis nonan ua majoria sufisenta en Congrès. Per açò, entà amiar endeuant es sues prepauses an de besonh negociar damb d’auti partits e artenher-ne es vòts. Se non artenhen pro supòrts, eth Congrès pòt refusar es sues iniciatives.

Deuant d’aguesta situacion, Sánchez a decidit dissòlver es Corts Generaus e convocar eleccions. Es Corts son formades peth Congrès des Deputats e eth Senat, es membres des quaus son escuelhudi pes ciutadans. En dissolver-les, acabe eth mandat des actuaus deputats e senadors e s’encète eth procès entà escuélher ua naua composicion de totes dues crambes.

E per qué se votarà eth 29 de noveme? Perqué era lei establís que, quan se convoquen eleccions generaus anticipades, an de passar 54 dies entre era publicacion dera convocatòria en BOE (Bulletin Oficiau der Estat) e era celebracion des eleccions. Aguest periòde permet as partits presentar es sues candidatures e amiar a tèrme çò que se coneish coma campanha electorau.

Qui govèrne enquiàs eleccions?

A despiet qu’es Corts Generaus siguen dissolvudes, Pedro Sánchez e eth sòn govèrn seguís ath capdeuant deth país enquia que se celebren es eleccions. Alavetz, tot seguís parièr enquiath dia dera votacion? Non exactament. Normaument son es deputats deth Congrès es que debatissen e vòten es leis e es mesures que prepause eth govèrn espanhòl.

Com qu’eth Congrès ei dissolvut, eth son Plen dejà non se pòt amassar ne votar com ac hè d’abituda. Entà evitar que quauques des sues foncions demoren sense èster atengudes pendent aguest periòde, era Constitucion establís era existéncia dera nomentada Deputacion Permanenta.

Aquest òrgan ei format per un grup mès reduït de representants. Eth Congrès, en lòc des 350 deputats abituaus, compde damb 68 deputats, ath delà dera presidenta dera cramba. Pot aucupar-se de determinades qüestions enquia que tornen a constituïr-se es Corts, com ara convalidar es reiaus decrèts lei qu’apròve eth govèrn.

E com se restaque açò damb era situacion actuau? Eth govèrn espanhòl pòt tornar a aprovar es decrèts sus abitatge e demanar que siguen convalidats. Aguest viatge, com qu’eth Congrès ei dissolvut, era votacion non se harie en Plen, senon ena Deputacion Permanenta. Ei a díder, es mesures aurien ua naua oportunitat de gésser endeuant abans des eleccions.

Era composicion d’aquest òrgan hè qu’era situacion sigue desparièra ara dera votacion qu’auec lòc en Plen, a on se refusèren es decrèts. Ena Deputacion Permanenta, es grups que balhen supòrt ath Govèrn (PSOE, Sumar, ERC, EH Bildu, PNV e eth Grup Mixt) somarien 35 vòts a favor, deuant des 34 deth PP, Vox e Junts.

De quina manèra t’afècte aguesta notícia?

A despiet que non ages 18 ans e non pogues votar en aguestes eleccions, çò que passe eth 29 de noveme tanben pòt auer conseqüéncies entath tòn futur. Es persones que siguen escuelhudes prenen decisions sus qüestions que mos afècten a toti es ciutadans, coma era educacion, er abitatge, ara aucupacion, era sanitat, e eth mèdi ambient…

Autant s’as era edat entà votar coma se non l’as, pòs profitar aguest moment entà informar-te, conéisher es prepauses des desparièrs partits e pensar quini problemes considères mès importanti. Quini ahèrs te preocupen mès? I a quauqua mesura que t’agradarie qu’eth pròxim govèrn aprovèsse?

Er ABC dera notícia

Eleccions generaus: votacion ena què es ciutadans escuelhen es sòns representants tath Congrès des Deputats e tath Senat. Pòden èster anticipades se se celèbren abans qu’acabe eth periòde previst d’ua legislatura.

Legislatura: periòde pendent eth quau es deputats e senadors escuelhudi en ues eleccions generaus exercissen eth sòn mandat. Era legislatura dure enquia que se celèbren naues eleccions o se dissolven es Corts.

BOE (Bulletin Oficiau der Estat): publicacion oficiau ena qué se i hèn publiques es leis, es normes e es decisions oficiaus der Estat entà qu’agen validesa e poguen èster coneishudes per toti es ciutadans.

Campanha Electorau: periòde anterior a ues eleccions en qué es partits presenten es sues prepauses e expliquen as ciutadans qué volen hèr s’arriben a governar.

Reiau decrèt lei: Norma que pòt aprovar eth Govèrn en casi de besonh extraordinari e urgent, mès qu’a d’èster convalidada pes deputats deth Congrès. Eth Govèrn de Sánchez aprovèc dus decrèts sus er abitatge a arraïtz deth desnonament de Maricarmen que, fin finau, sigueren refusadi en Congrès.

Desnonament: procediment legau peth quau un proprietari artenh qu’un jutge ordène a un logatari o aucupant que dèishe un abitatge o locau.

Dissòlver es Corts Generaus: Finalizar, de manèra auançada, eth mandat deth Congrès des Deputats e deth Senat abans qu’acabe eth periòde ordinari de quate ans, çò que supause que i age, obligatoriament, era convocatòria de naues eleccions generaus.

Deputacion Permanenta: òrgan constitucionau des Corts Generaus d’Espanha, encargat de velhar pes poders des crambes quan non son amassades.

Ahèr: un tèma, ua qüestion, ua aucupacion o un hèt determinat.

Besonh: aquerò que se considère necessari, obligatòri e deth quau non se pòt prescindir entà víuer o hèr quauquarren.

Activitat